ಡಿಜಿಟಲ್ ಶಿಕ್ಷಣ: ತಂತ್ರಜ್ಞಾನ ಸದ್ಬಳಕೆಯಿಂದ ಶೈಕ್ಷಣಿಕ ಕ್ರಾಂತಿ
ಜಗತ್ತಿನಲ್ಲಿ ಆಧುನಿಕ ಶಿಕ್ಷಣ ಎಲ್ಲೆಡೆ ವ್ಯಾಪಿಸಿದ್ದು, ತಂತ್ರಜ್ಞಾನ ದಿನೇ ದಿನೇ ಹೊಸ ಹೊಸ ರೂಪದಲ್ಲಿ ಕಲಿಕೆಯ ಆಯಾಮಗಳನ್ನು ವಿಸ್ತರಿಸುತ್ತಿದೆ.
ಇಂದಿನ ತಂತ್ರಜ್ಞಾನ ಸರಿಯಾಗಿ ಉಪಯೋಗಿಸಿದರೆ ಶಿಕ್ಷಣ ಕ್ಷೇತ್ರದಲ್ಲಿ ಕ್ರಾಂತಿ ಮಾಡಲು ಸಾಧ್ಯ. ಗಣಕಾಧಾರಿತ ಶಿಕ್ಷಣದಿಂದ ಪ್ರತಿ ವಿದ್ಯಾರ್ಥಿಯೂ ಕಲಿಕೆಯ ವೇಗವನ್ನು ಹೆಚ್ಚಿಸಿಕೊಳ್ಳಬಹುದು.
ಕೌಶಲ ಅಳವಡಿಕೆಗೆ ಆದ್ಯತೆ
ಉತ್ಪಾದಕತೆ ಹೆಚ್ಚಳ
ಶಿಕ್ಷಣದಲ್ಲಿ ಅಂತರ್ಜಾಲವನ್ನು ಬಳಸುವುದರಿಂದ ಮುಕ್ತ ಶೈಕ್ಷಣಿಕ ಸಂಪನ್ಮೂಲಗಳು ಹೇರಳವಾಗಿ ದೊರೆಯುತ್ತವೆ ಮತ್ತು ಇತರ ತಂತ್ರಗಳ ಬಳಕೆಯಿಂದ ಕಲಿಕೆಯ ಉತ್ಪಾದಕತೆಯನ್ನು ಹೆಚ್ಚಿಸಬಹುದು. ಅಲ್ಲದೆ ಮಕ್ಕಳು ಚಿಂತಿಸುವ, ಗ್ರಹಿಸುವ ಮತ್ತು ಕಾರ್ಯನಿರ್ವಹಿಸುವ ರೀತಿಯಲ್ಲಿ ಅಪಾರ ಬದಲಾವಣೆ ಸಾಧ್ಯ.
ಇ-ಲರ್ನಿಂಗ್
ಇಂದು ಇಂಟರ್ನೆಟ್, ಸ್ಮಾರ್ಟ್ ಫೋನ್, ವೆಬ್‍ಸೈಟ್, ಬ್ಲಾಗ್, ಆ್ಯಪ್‍ಗಳ ಬಳಕೆ ಹೆಚ್ಚಿದ್ದು, ಇ-ಲರ್ನಿಂಗ್‍ನತ್ತ ಮಕ್ಕಳು ಬಹಳಷ್ಟು ಆಕರ್ಷಿತರಾಗುತ್ತಿದ್ದಾರೆ. ಇಂದು ಇ-ಲರ್ನಿಂಗ್‍ಗೆ ಹೆಚ್ಚು ಪ್ರಾಮುಖ್ಯ ನೀಡಲು ಶಿಕ್ಷಣ ಸಂಸ್ಥೆಗಳು ಮುಂದಾಗುತ್ತಿವೆ. ಅದಕ್ಕಾಗಿಯೇ ಶಾಲಾ-ಕಾಲೇಜುಗಳು ಆ್ಯಪ್ ಮೂಲಕ ವಿದ್ಯಾರ್ಥಿಗಳೊಡನೆ ಸಂವಹನ ನಡೆಸುತ್ತಿವೆ.
ಇ-ಲರ್ನಿಂಗ್ ವಿದ್ಯಾರ್ಥಿಗಳಿಗೆ ಯಾವುದೇ ಸಮಯ ಮತ್ತು ಯಾವುದೇ ಸ್ಥಳದಲ್ಲಿ ಬೇಕಾದರೂ ಕೂತು ಕಲಿಯುವಂತಹ ಅವಕಾಶವನ್ನು ಒದಗಿಸುತ್ತದೆ. ಆನ್‍ಲೈನ್‍ನಲ್ಲಿ ಬೋಧಕ ವರ್ಗದ ಸೀಮಾತೀತ ಸಂಪರ್ಕ ಸಾಧ್ಯವಿದೆ. ಇ-ಲರ್ನಿಂಗ್‍ನಲ್ಲಿ ಕಲಿಕೆ ಪ್ರಗತಿಗೆ ವ್ಯವಸ್ಥಿತ ವಿಧಾನ, ಶಿಕ್ಷಣ ವೆಚ್ಚ ಖಡಿಮೆ, ಕೋರ್ಸ್ ವಿಷಯಗಳ ಗುಣಮಟ್ಟಕ್ಕೆ ಮಾನದಂಡ ಮೊದಲಾದ ಸೌಲಭ್ಯಗಳಿವೆ.
ಮುಖ್ಯವಾಗಿ ಇ-ಲರ್ನಿಂಗ್ ತಂತ್ರಜ್ಞಾನ, ಹಣಕಾಸು, ಎಂಜಿನಿಯರಿಂಗ್, ಬ್ಯಾಂಕಿಂಗ್, ಮ್ಯಾನೇಜ್‍ಮೆಂಟ್ ಮೊದಲಾದ ಕ್ಷೇತ್ರಗಳತ್ತ ಗಮನ ಕೇಂದ್ರೀಕರಿಸಿದೆ. ಹಾಗಾಗಿಯೇ ಇಂದು ಮಕ್ಕಳು ದೈನಂದಿನ ಜೀವನದಲ್ಲಿ ತಂತ್ರಜ್ಞಾನ ಅಳವಡಿಕೆ ವಿಷಯಕ್ಕೆ ಬಂದಾಗ ಹೆತ್ತವರು ಮತ್ತು ಶಿಕ್ಷಕರಿಗಿಂತ ಒಂದು ಹೆಜ್ಜೆ ಮುಂದಿರುತ್ತಾರೆ.
ಅತ್ಯಂತ ಹೆಚ್ಚಿನ ಮಾಹಿತಿದಾರನಾಗಿ ಇಂದು ಇಂಟರ್ನೆಟ್ ಸರ್ಚ್ ಇಂಜಿನ್ ಕಾರ್ಯನಿರ್ವಹಿಸುತ್ತಿದೆ. ಮೈಕ್ರೊಫೋನ್, ಪ್ರೊಜೆಕ್ಟರ್ ಗಳು, ಪವರ್ಪಾಯಿಂಟ್ ಪ್ರೆಸೆಂಟೇಷನ್‍ಗಳು ಸಂವಹನವನ್ನು ಪರಿಣಾಮಕಾರಿಯನ್ನಾಗಿಸಲು ಸಹಕರಿಸುತ್ತವೆ.
ಎಳೆಯ ವಯಸ್ಸಿನಲ್ಲಿ ಮಕ್ಕಳಿಗೆ ಗಮನ, ಸ್ಮರಣೆ, ಕಲಿಕೆ, ಪುನರಾವರ್ತನೆ, ಮುಂತಾದ ಸಾಮರ್ಥ್ಯ ಹೆಚ್ಚಿರುತ್ತದೆ. ಆಗ ತಂತ್ರಜ್ಞಾನದ ಕಲಿಕೆ ಸುಲಭ ಸಾಧ್ಯ. ಹಾಗಾಗಿ ಅವರು ತಂತ್ರಜ್ಞಾನ ಉಪಕರಣಗಳ ಕಡೆಗೆ ಆಕರ್ಷಿತರಾಗುತ್ತಾರೆ. ಇದು ಅವರ ಜ್ಞಾನ ಸಂಪತ್ತು ವೃದ್ಧಿಗೆ ಪ್ರಯೋಜನಕಾರಿ. ಅಲ್ಲದೆ ಮಕ್ಕಳ ಬೆಳವಣಿಗೆಯ ವೇಗವನ್ನು ಹೆಚ್ಚಿಸಲು ಹಾಗೂ ತಮಗೆ ಬೇಕಾದ ಅಂಶವನ್ನು ಅವರು ಪಡೆಯಲು ತಂತ್ರಜ್ಞಾನ ನೆರವು ನೀಡುತ್ತದೆ.
ಕಲಿಕೆಯ ಆಸಕ್ತಿ ಹೆಚ್ಚಿಸುತ್ತದೆ
ಡಿಜಿಟಲೈಸ್ಡ್ ಬೋರ್ಡ್‍ಗಳ ಬಳಕೆ ವಿದ್ಯಾರ್ಥಿಗಳ ಕಲಿಕೆಯ ಆಸಕ್ತಿಯನ್ನು ಹೆಚ್ಚಿಸುತ್ತವೆ. ಹಾಜರಾತಿಗೆ ಬಯೋಮೆಟ್ರಿಕ್ ವ್ಯವಸ್ಥೆ ಅಳವಡಿಸುವುದು, ಶಿಕ್ಷಣದ ಗುಣಮಟ್ಟ ಸುಧಾರಣೆ ಹಾಗೂ ವಿದ್ಯಾರ್ಥಿಗಳ ಅಭಿಪ್ರಾಯ ಸಂಗ್ರಹಕ್ಕೂ ಆಧುನಿಕ ತಂತ್ರಜ್ಞಾನ ಬಳಸುವುದು ಉತ್ತಮ.
ಪರೀಕ್ಷೆ, ಮೌಲ್ಯಮಾಪನ ಆನ್‍ಲೈನ್ ಮುಖಾಂತರ ನಡೆಸುವುದು ಹೆಚ್ಚು ಪರಿಣಾಮಕಾರಿ. ಹೇಗೆಂದರೆ ಇಲ್ಲಿ ನಕಲು ಮಾಡುವುದನ್ನು ತಡೆಯಬಹುದು. ಅಲ್ಲದೆ ಸಾಕಷ್ಟು ಸಮಯ ಮತ್ತು ಶ್ರಮ ಉಳಿಯುವುದು.
ವಿದ್ಯಾರ್ಥಿಗಳು ಇಂದು ಗ್ರೂಪ್ ಸ್ಟಡಿಯನ್ನು ಹೆಚ್ಚಾಗಿ ಅವಲಂಭಿಸುತ್ತಿದ್ದು, ಅದಕ್ಕೆ ವಾಟ್ಸ್ಆ್ಯಪ್, ಫೇಸ್‍ಬುಕ್‍ಗಳಂತಹ ಸಾಮಾಜಿಕ ಜಾಲತಾಣಗಳು, ವೀಡಿಯೋ ಕಾನ್ಫ್ ರೆನ್ಸ್ ಬಹಳಷ್ಟು ಸಹಕಾರಿಯಾಗಿವೆ.
ಯಾವ ರೀತಿಯ ತಂತ್ರಜ್ಞಾನಗಳನ್ನು ಅಳವಡಿಸಿಕೊಳ್ಳಬೇಕು, ಸದ್ಬಳಕೆ ಮಾಡಬೇಕು ಎನ್ನುವ ಬಗ್ಗೆ ಹೆತ್ತವರು ಹಾಗೂ ಶಿಕ್ಷಕರು ಮಕ್ಕಳಿಗೆ ಸ್ಪಷ್ಟವಾದ ಮಾಹಿತಿ ನೀಡಬೇಕು.
ಡಿಜಿಟಲ್ ಶಿಕ್ಷಣ ಅನಿವಾರ್ಯ
ಇಡೀ ಜಗತ್ತೇ ಇಂದು ಡಿಜಿಟಲ್ ವ್ಯವಸ್ಥೆಗೆ ತನ್ನನ್ನು ತೆರೆದುಕೊಂಡಿರುವುದರಿಂದ ಶಿಕ್ಷಣ ಕ್ಷೇತ್ರವು ಅದಕ್ಕೆ ತಕ್ಕಂತೆ ಅದಕ್ಕೆ ಅಪ್‍ಡೇಟ್ ಆಗುವುದು ಅನಿವಾರ್ಯ. ಕಲಿಕಾ ಪ್ರಕ್ರಿಯೆಯಲ್ಲಿ ವಿದ್ಯಾರ್ಥಿಗಳನ್ನು ಸಕ್ರಿಯವಾಗಿಸಲು ಶಾಲೆಗಳಲ್ಲಿ ಆಧುನಿಕ ತಂತ್ರಜ್ಞಾನಗಳ ಅನುಷ್ಠಾನ ಅತೀ ಅಗತ್ಯ. ನಮ್ಮ ದೇಶದಲ್ಲಿ ಶಿಕ್ಷಣಕ್ಕೆ ಸಂಬಂಧಿಸಿದಂತೆ ತಂತ್ರಜ್ಞಾನದ ಸಾಮರ್ಥ್ಯವನ್ನು ಇನ್ನಷ್ಟು ಪರಿಪೂರ್ಣವಾಗಿ ಬಳಸಬೇಕಿದೆ.
ಕೋವಿಡ್ -19 ವಕ್ಕರಿಸಿದ ಪರಿಣಾಮ ಇಂದು ಅನಿವಾರ್ಯವಾಗಿ ಶೈಕ್ಷಣಿಕ ಕ್ಷೇತ್ರ ಪೂರ್ಣಪ್ರಮಾಣದಲ್ಲಿ ಡಿಜಿಟಲ್ ವ್ಯವಸ್ಥೆಯನ್ನು ಅವಲಂಭಿಸುವಂತಾಗಿದೆ. ಆದರೆ ನಮ್ಮಂತಹ ದೇಶಗಳಲ್ಲಿ ನೆಟ್ವರ್ಕ್ ವ್ಯವಸ್ಥೆ, ತಂತ್ರಜ್ಞಾನದ ಅಳವಡಿಕೆ, ಬಳಕೆ ಹಾಗೂ ತರಗತಿ ಪಠ್ಯ ಕ್ರಮಗಳಿಗೆ ಪೂರಕವಾಗುವ ರೀತಿಯ ತಂತ್ರಾಂಶಗಳ ಅಭಿವೃದ್ಧಿ ಇತ್ಯಾದಿ ಸಮಸ್ಯೆಗಳು ಕಾಡುತ್ತಿವೆ. ಆದ್ದರಿಂದ ಇವುಗಳ ಬಗ್ಗೆ ಸಂಬಂಧಪಟ್ಟವರು ಶೀಘ್ರ ಕ್ರಮ ಕೈಗೊಳ್ಳಬೇಕಿದೆ.
*ಗಣೇಶ ಕುಳಮರ್ವ
