ಮೂಲೆ ಸೇರುತ್ತಿರುವ ಅರೆಯುವಕಲ್ಲು

ಮನುಷ್ಯ ತನ್ನ ಜೀವನದಲ್ಲಿ ಸದಾ ವೈವಿಧ್ಯವನ್ನು ಬಯಸುತ್ತಾನೆ. ಆಹಾರದ ವಿಷಯಕ್ಕೆ ಬಂದಾಗ ಅದು ಬಹಳ ಪ್ರಮುಖವಾಗುತ್ತದೆ. ವಿವಿಧ ತರಹದ ರುಚಿ - ರುಚಿಯಾದ ಅಡುಗೆ ತಯಾರಿಸಿ ತಿನ್ನುವುದು ಅವನ ಹವ್ಯಾಸವು ಕೂಡ. ಹೀಗೆ ನಾನಾ ವಿಧದ ಅಡುಗೆ ತಯಾರಿಗೆ ಅರೆಯುವಕಲ್ಲು ಬೇಕೆಬೇಕು. ಹಳ್ಳಿಗಳಲ್ಲಿ ಸಾಮಾನ್ಯವಾಗಿ ಹೆಚ್ಚಿನ ಪದಾರ್ಥ, ತಿಂಡಿ - ತಿನಸುಗಳನ್ನು ಅರೆದೇ ತಯಾರಿಸಲಾಗುತ್ತದೆ. ಆದ್ದರಿಂದ ಅರೆಯುವಕಲ್ಲು ಹೆಂಗೆಳೆಯರ ಅಡುಗೆ ಮನೆಯ ದೈನಂದಿನ ಸಂಗಾತಿ.
ತೆಂಗಿನ ಕಾಯಿ, ಅಕ್ಕಿ, ಗೋಧಿ ಇತ್ಯಾದಿಗಳನ್ನು ಅರೆಯಲು, ಸಾಂಬಾರು ಪದಾರ್ಥಗಳನ್ನು ಕುಟ್ಟಿ ಪುಡಿ ಮಾಡಲು ಹಿಂದಿನ ಕಾಲದಲ್ಲಿ ಅರೆಯುವಕಲ್ಲನೇ ಬಳಸಲಾಗುತ್ತಿತ್ತು. ಆದ್ದರಿಂದ ಸಾಮಾನ್ಯವಾಗಿ 'ಅರೆಯುವಕಲ್ಲು ಇಲ್ಲದ ಮನೆಗಳೇ ಇಲ್ಲ'ಎಂಬ ಮಾತಿದೆ. ಅರೆಯುವಕಲ್ಲು, ಬೀಸುವಕಲ್ಲು, ಕಟ್ಟುವಕಲ್ಲು ಹೀಗೆ ಬೇರೆಬೇರೆ ವಿಧದ ಕಲ್ಲುಗಳನ್ನು ಹಳ್ಳಿಗಳಲ್ಲಿ ಜನರು ಬಳಸುತ್ತಾರೆ. ಈ ರೀತಿಯ mule seruttiruva areuvakalluಕಲ್ಲುಗಳಲ್ಲಿ ಅರೆದು ತಯಾರಿಸಿದ ಅಡುಗೆ, ತಿಂಡಿ - ತಿನಸುಗಳು ವಿಶೇಷವಾಗಿರುತ್ತವೆ ಮತ್ತು ತುಂಬಾ ರುಚಿಯಾಗಿರುತ್ತವೆ. ಆದರೆ ಇಂದು ಅರೆಯುವಕಲ್ಲು ಮೂಲೆಗುಂಪಾಗುತ್ತಿದೆ.
ಮಿಕ್ಸಿ, ಗ್ರ್ಯಾಂಡರ್ ಬಳಕೆ
ಇಂದು ಕಾಲ ಬದಲಾಗಿದೆ. ಆಧುನಿಕತೆ ಬೆಳೆದಂತೆ ಮನುಷ್ಯ ತನ್ನ ದೈನಂದಿನ ಚಟುವಟಿಕೆಗಳಲ್ಲಿ ಯಂತ್ರಗಳ ಸಹಭಾಗಿತ್ವ ಪಡೆದುಕೊಂಡಿದ್ದಾನೆ. ದೈಹಿಕ ಶ್ರಮ ಕಡಿಮೆಯಾಗಿ, ಯಂತ್ರಗಳ ಬಳಕೆ ಹೆಚ್ಚಾಗಿದೆ. ಎಲ್ಲಾ ಕ್ಷೇತ್ರಗಳಲ್ಲೂ ವಿದ್ಯುತ್ ಚಾಲಿತ ಉಪಕರಣಗಳ ಬಳಕೆ ಸಾಮಾನ್ಯವಾಗಿ ಬಿಟ್ಟಿದೆ. ಹಾಗೇ ಇಲ್ಲಿ ಅರೆಯುವಕಲ್ಲಿ ಜಾಗವನ್ನು ಮಿಕ್ಸಿ, ಗ್ರ್ಯಾಂಡರ್ಗಳು ಆಕ್ರಮಿಸಿಕೊಂಡಿವೆ. ಬಹಳ ಕಡಿಮೆ ಸಮಯದಲ್ಲಿ, ದೈಹಿಕ ಶ್ರಮವಿಲ್ಲದೆ ಸುಲಭವಾಗಿ ಬಹಳ ನುಣುಪಾಗಿ ಆಹಾರ ಪದಾರ್ಥಗಳನ್ನು ಅರೆದು ಅಡುಗೆ ತಯಾರಿಸಲು ಈ ವಿದ್ಯುತ್ ಚಾಲಿತ ಉಪಕರಣಗಳು ಸಹಕಾರಿ. ಇಂದಿನ ಒತ್ತಡದ ಬದುಕಿನಲ್ಲಿ ಜನರಿಗೆ ಯಾವುದೇ ಕೆಲಸ ಮಾಡಲು ಸಮಯವಿಲ್ಲ. ಇದರಿಂದ ತುಂಬಾ ಸಮಯ ಅರೆಯುವಕಲ್ಲಿನಲ್ಲಿ ಅರೆಯುತ್ತಾ ಇರಲು ಸಾಧ್ಯವಿಲ್ಲ ಎಂದು ಅವರು ಮಿಕ್ಸಿ, ಗ್ರ್ಯಾಂಡರ್ಗಳನ್ನು ಬಳಸತೊಡಗಿದರು.
ಮರೆಗೆ ಕಾರಣ
ಇಂದು ಎಲ್ಲಿ ನೋಡಿದರು ಚಿಕ್ಕ -ಚಿಕ್ಕ ಮನೆಗಳೇ ಕಾಣಬಹುದು. ಅವುಗಳಲ್ಲಿ ಅಷ್ಟು ದೊಡ್ಡದಾಗಿ, ಭಾರವಾಗಿರುವ ಅರೆಯುವಕಲ್ಲುಗಳನ್ನು ಇಡಲು ಸ್ಥಳಾವಕಾಶದ ಕೊರೆತೆ ಕೂಡ ಇದೆ. ಮತ್ತೆ ಅವುಗಳನ್ನು ಸ್ಥಳಾಂತರಿಸುವುದು ಕೂಡ ಕಷ್ಟದ ಕೆಲಸ. ಈ ಕಾರಣಗಳಿಂದ ಇಂದು ಅರೆಯುವಕಲ್ಲು ಮರೆಯಾಗುತ್ತಿದೆ. ಮುಂದಿನ ಜನಾಂಗದವರಿಗೆ ಅದರ ಪರಿಚಯವೇ ಇಲ್ಲದಗಬಹುದು. ಅವರು ಅದನ್ನು ವಸ್ತು ಸಂಗ್ರಹಾಲಯಗಳಲ್ಲಿ ನೋಡಬೇಕಾಗಿ ಬಂದರು ಆಶ್ಚರ್ಯವಿಲ್ಲ.
ತಯಾರಿ 
ಅರೆಯುವಕಲ್ಲುಗಳನ್ನು ಸಾಮಾನ್ಯವಾಗಿ ಯಾವುದೇ ಕಾರ್ಖಾನೆಗಳಲ್ಲಿ ತಯಾರಿಸುವುದಿಲ್ಲ. ಅರೆಯುವಕಲ್ಲು ತಯಾರಕರು ಕಪ್ಪುಕಲ್ಲಿನ ಕೋರೆ (ಗಣಿ)ಗಳಿಂದ, ಅವುಗಳ ಮಾಲಕರಿಗೆ ಹಣಕೊಟ್ಟು ದೊಡ್ಡ ಗಾತ್ರದ ಕಲ್ಲುಗಳನ್ನು ಪಡೆಯುತ್ತಾರೆ. ಯಾರಾದರೂ ಅರೆಯುವಕಲ್ಲು ಬೇಕೆಂದು ಆರ್ಡರ್ ನೀಡಿದಾಗ ಕಲ್ಲಿನ ತಯಾರಿಸುವ ಕಾರ್ಯ ಆರಂಭಿಸುತ್ತಾರೆ. ಅವರು ಬೇರೆಬೇರೆ ಗಾತ್ರದ ವಿವಿಧ ಉಳಿ, ಸುತ್ತಿಗೆಗಳನ್ನು ಬಳಸಿ ಬೃಹತ್ ಕಲ್ಲುಗಳನ್ನು ಕೆತ್ತಿ ಸುಂದರ ಆಕೃತಿ ನೀಡುತ್ತಾರೆ. ಒಂದು ಕಲ್ಲು ಸಿದ್ಧಗೊಳಿಸಲು ಮೂರು - ನಾಲ್ಕು ದಿನಗಳಾದರೂಬೇಕು. ಬೇಡಿಕೆಗೆ ತಕ್ಕುದಾಗಿ ಸಣ್ಣ ಹಾಗೂ ದೊಡ್ಡ ಗಾತ್ರದ ಅರೆಯುವ ಕಲ್ಲುಗಳನ್ನು ತಯಾರಿಸುತ್ತಾರೆ. ಸಿದ್ಧಗೊಂಡ ಕಲ್ಲಿನ ಬೆಲೆ ಸಾಮಾನ್ಯವಾಗಿ 100ರಿಂದ 2,500 ರೂ.ಗಳ ವರೆಗಿರುತ್ತವೆ.
ಬಳಕೆಯ ಪ್ರಯೋಜನ
ಅರೆಯುವಕಲ್ಲು ಬಳಕೆಯಿಂದ ಅದೆಷ್ಟೊ ಅರೆಯುವಕಲ್ಲು ಸಿದ್ದಪಡಿಸುವ ಕಾರ್ಮಿಕರಿಗೆ ಉದ್ಯೋಗ ದೊರೆಯುತ್ತದೆ. ಮಿಕ್ಸಿ, ಗ್ರ್ಯಾಂಡರ್ಗಳ ಬಳಕೆಗೆ ಬಹಳಷ್ಟು ವಿದ್ಯುತ್ ಬೇಕಾಗುವುದರಿಂದ ವಿದ್ಯುತ್ ಕೊರತೆಗೆ ಅದು ಕಾರಣವಾಗುತ್ತದೆ. ಇದನ್ನು ತಡೆಯಲು ಸಮಯಾವಕಾಶ ಇರುವಾಗಲಾದರೂ ಅರೆಯುವಕಲ್ಲು ಬಳಕೆ ಮಾಡಿದರೆ ಉತ್ತಮ.
ಮಿಕ್ಸಿ, ಗ್ರ್ಯಾಂಡರ್ಗಳಲ್ಲಿ ರುಬ್ಬಿ ಅಥವಾ ಪುಡಿ ಮಾಡಿ ತಯಾರಿಸಿದ ಆಹಾರ ಪದಾರ್ಥಗಳು ಆಧುನಿಕ ಕಾಲದ ಜನರ ಬಾಯಿ ಚಪಲಕ್ಕೆ ಒಗ್ಗುತ್ತವೆ. ಆದರೆ ಆರೋಗ್ಯ ಯಾವಾಗಲೂ ಉತ್ತಮವಾಗಿರಬೇಕು ಎಂದು ಭಾವಿಸುವ ಮಂದಿಗೆ ಇಂದಿಗೂ ಸಾಂಪ್ರದಾಯಿಕ ಅರೆಯುವಕಲ್ಲಿನಲ್ಲಿನ ಸಹಾಯದಿಂದಲೇ ತಯಾರಿಸಿದ ಪದಾರ್ಥಗಳೇ ಇಷ್ಟ. ಇಂತಹ ಪದ್ಧತಿ ಇಂದು ಹಳ್ಳಿಗಳಲ್ಲಿ ಕೆಲವೊಂದೆಡೆ ಮಾತ್ರ ಉಳಿದುಕೊಂಡಿದೆ.
 ಉತ್ತಮ ವ್ಯಾಯಾಮ
ಅರೆಯುವಕಲ್ಲುಘಿಗಳ ಬಳಕೆ ನಮ್ಮ ದೈಹಿಕ ಆರೋಗ್ಯದ ಮೇಲೂ ಉತ್ತಮ ಪರಿಣಾಮ ಬೀರುತ್ತದೆ. ಇವುಗಳ ಬಳಕೆಯಿಂದ ದೇಹಕ್ಕೆ ಉತ್ತಮ ವ್ಯಾಯಾಮ ದೊರೆಯುತ್ತದೆ. ಇದರಿಂದ ದೈಹಿಕವಾಗಿ ಸದೃಢರಾಗಿರುತ್ತೇವೆ. ಕಾಲಕಾಲಕ್ಕೆ ಹಸಿವು, ನಿದ್ದೆ ಸರಿಯಾಗಿ ಬರಲು ಕೂಡ ಇದು ಸಹಕಾರಿಯಾಗಿದೆ. ಅಲ್ಲದೆ ತೋಳು ಬಲವೃದ್ಧಿಸುತ್ತದೆ.