ಜನಾಕರ್ಷಣೆಯ ಸ್ಪನ್ ಶರ್ಟ್ಗಳು

ಶರ್ಟ್ ತುಂಬಾ ಚೆನ್ನಾಗಿದೆ, ಹೊಸತಾ? ಬಟ್ಟೆ ಯಾವುದು ಸ್ಪನಾ? ಹೌದು, ಹೊಸ ಶರ್ಟ್ ಧರಿಸಿರುವಾಗ ನಮಗೆ ಪರಿಚಯದವರು ಯಾರೇ ಸಿಕ್ಕಿದರೂ ಕೇಳುವ ಸಾಮಾನ್ಯ ಪ್ರಶ್ನೆ ಇದು. ಯಾಕೆಂದರೆ ಇಂದು ಸ್ಪನ್ ಬಟ್ಟೆಯಿಂದ ಸಿದ್ಧಪಡಿಸಿದ ಶರ್ಟ್ ಧರಿಸುವುದು ಫ್ಯಾಶನ್ ಆಗಿಬಿಟ್ಟಿದೆ.
ಯಾವುದೇ ಸಿದ್ದಡುಪುಗಳ ಮಳಿಗೆ, ಟೈಲರ್ ಅಂಗಡಿಗಳಲ್ಲಿ ಗಮನಿಸಿದರೂ ಸ್ಪನ್ ಬಟ್ಟೆಯಿಂದ ತಯಾರಿಸಿದ ಅಂಗಿಕೊಳ್ಳುವವರೇ ಹೆಚ್ಚು. ಕೆಲವು ವರ್ಷಗಳ ಹಿಂದೆ ಕಾಟನ್, ನೈಲನ್ ಪೋಲಿಸ್ಟಾರ್ ಬಟ್ಟೆಗಳಿಗೆ ಬಹುಬೇಡಿಕೆ ಇತ್ತು. ಆದರೆ ಈಗ ಅವುಗಳಿಗೆ ಮಾರುಕಟ್ಟೆ ಕಡಿಮೆಯಾಗಿದೆ. ಎಲ್ಲರ ಬಾಯಲ್ಲೂ ಸ್ಪನ್ ಬಟ್ಟೆಗಳದ್ದೇ ಸುದ್ದಿ. ಯುವಕರಿಗಂತೂ ಸ್ಪನ್ ಬಟ್ಟೆ ಬಹು ಅಚ್ಚುಮೆಚ್ಚು. ಜನರಿಗೆ ಅಂಗಿಯ ಬಣ್ಣ, ಬೆಲೆ, ಗುಣಮಟ್ಟ ಇತ್ಯಾದಿಗಳ ಜತೆಗೆ ಅದು ಯಾವರೀತಿಯ ಬಟ್ಟೆಯಿಂದ ತಯಾರಿಸಿದ್ದು ಎನ್ನುವುದು ಸಹ ಬಹಳ ಮುಖ್ಯ. ಆದ್ದರಿಂದಲೇ ಜನ ಇಂದು ನಿದರ್ಧಿಷ್ಟ ಬಟ್ಟೆಯಿಂದ ಸಿದ್ದಪಡಿಸಿದ ಶರ್ಟ್ಗಳನ್ನೇ ಮಾರುಕಟ್ಟೆಗಳಲ್ಲಿ ಕೇಳಿ ಪಡೆಯುತ್ತಾರೆ.
ಸ್ಪನ್ ತಯಾರಿ 
ಕಾಟನ್ ಮತ್ತು ಸಿಂತೆಟಿಕ್ ಸಿಲ್ಕ್ಗಳನ್ನು ಒಂದು ನಿರ್ಧಿಷ್ಟ ಪ್ರಮಾಣದಲ್ಲಿ ಸೇರಿಸಿ ಸ್ಪನ್ ಬಟ್ಟೆಗಳನ್ನು ತಯಾರಿಸಲಾಗುತ್ತದೆ. ಸ್ಪನ್ ಬಟ್ಟೆಯ ಉತ್ಪನ್ನಗಳು ದುಬಾರಿ ಬೆಲೆಯವುಗಳು. ಕೆಲವೊಂದು ಪ್ರಮುಖ ಕಂಪೆನಿಗಳು ಮಾತ್ರ ಉತ್ತಮ ದರ್ಜೆಯ ಸ್ಪನ್ ಬಟ್ಟೆಗಳನ್ನು ತಯಾರಿಸಿ, ಮಾರಾಟ ಮಾಡುತ್ತವೆ. ಆದರೆ ಇಂದು ಜನರಿಗೆ ಉಂಟಾಗಿರುವ ಸ್ಪನ್ ಮೇನಿಯಾದಿಂದಾಗಿ ಇದರ ಬೇಡಿಕೆ ಹೆಚ್ಚಿದೆ. ಇದರಿಂದಾಗಿ ಕಡಿಮೆ ಬೆಲೆಗೆ ಸ್ಪನ್ ಬಟ್ಟೆಗಳು ಎಂದು ಹೇಳಕೊಳ್ಳುವ ನಕಲಿ ಉಡುಪುಗಲು ಜನರಿಗೆ ಮೋಸ ಮಾಡುತ್ತಿವೆ. ಅದರಲ್ಲೂ ಕೆಲವೊಂದು ಬಟ್ಟೆಗಳನ್ನು ಸ್ಪನ್ನಂತೆಯೇ ತಯಾರಿಸಲಾಗುತ್ತದೆ. ಆದರೆ ಕಾಟನ್ ಮತ್ತು ಸಿಂತೆಟಿಕ್ ಬಳಕೆಯ ಪ್ರಮಾಣದಲ್ಲಿ ವ್ಯತ್ಯಾಸ ಮಾಡಿರೆತ್ತಾರೆ.
ವಿಶೇಷ
ಸ್ಪನ್ ಬಟ್ಟೆಯಿಂದ ತಯಾರಿಸಿದ ಶರ್ಟ್ಗಳು ತೊಳೆದರೆ ಅಥವಾ ಒದ್ದೆಯಾದರೆ ಬಹುಬೇಗನೆ ಒಣಗುತ್ತವೆ. ಅದು ಮಳೆ, ಚಳಿ, ಬೇಸಗೆ ಹೀಗೆ ಎಲ್ಲ ಕಾಲಗಳಲ್ಲಿಯೂ ಧರಿಸಲು ಸಹಕಾರಿ. ಒಮ್ಮೆ ಇಸ್ತ್ರಿ ಮಾಡಿದರೆ ಸಾಕು ತುಂಬಾ ಸಮಯ ಹಾಗೇ ಉಳಿಯುತ್ತದೆ. ಪ್ರತಿ ಸಲ ವಾಶ್ ಮಾಡಿದಾಗಲೂ ಇಸ್ತ್ರಿ ಮಾಡಲೇಬೇಕೆಂದಿಲ್ಲ. ಸ್ಪನ್ ಬಟ್ಟೆ ಬಹಳ ನಯವಾಗಿದ್ದು, ಕೈಯಲ್ಲಿ ಮುಟ್ಟಲು, ಧರಿಸಲು ಹಿತವೆನಿಸುವುದು. ಅಲ್ಲದೆ ಅದಕ್ಕೆ ಹೊಳೆಯುವ ಗುಣವಿದ್ದು, ಎಲ್ಲರನ್ನು ಅದು ಆಕರ್ಷಿಸಿದೆ.
ಸೀರೆಯ ಸೆರಗಿಗೆ, ಚೂಡಿದಾರದ ಕೈ ಮತ್ತು ಕತ್ತಿನ ಭಾಗಗಳಿಗೆ ಬೇರೆ ಬಣ್ಣ, ವಿನ್ಯಾಸದ ಬಟ್ಟೆಗಳನ್ನು ಜೋಡಿಸುತ್ತಾರೆ. ಸೀರೆ, ಚೂಡಿದಾರದ ಬಟ್ಟೆ ಖರೀದಿಸುವಾಗ ಅದಕ್ಕೆ ವಿನ್ಯಾಸಗೊಳಿಸುವ ಬಟ್ಟೆಗಳು ಒಟ್ಟಿಗೆ ದೊರೆಯುವುದು ಸಾಮಾನ್ಯ. ಇಂದು ಶರ್ಟ್ ಪೀಸ್ಗಳ ಜತೆಗೂ ಕಾಲರ್, ಕೈ ಮತ್ತು ಬಟನ್ನ ಪಟ್ಟಿಗೆ ಇಡಲು ಬೇರೆ ಬಣ್ಣ ಮತ್ತು ವಿನ್ಯಾಸದ ಬಟ್ಟೆಗಳು ಸಿಗುತ್ತಿರುವುದು ವಿಶೇಷ. ಸ್ಪನ್ ಮೇನಿಯ ಆರಂಭವಾಗಿ ಸುಮಾರು ಮೂರು - ನಾಲ್ಕು ವರ್ಷಗಳೆ ಸಂದವು. ಅವುಗಳ ಬೇಡಿಕೆಯನ್ನು ಮತ್ತಷ್ಟು ಹೆಚ್ಚಿಸಿಕೊಳ್ಳಲು ತಯಾರಿಕ ಕಂಪೆನಿಗಳು ವಿವಿಧ ರೀತಿಯ ಪ್ರಯೋಗಗಳನ್ನು ಮಾಡುತ್ತಿವೆ.