ಉಪ್ಪು, ಹುಳಿ, ಖಾರ ಮಿಶ್ರಿತ ಪದಾರ್ಥ ಯಾರಿಗೆ ಇಷ್ಟವಾಗಲ್ಲ ಹೇಳಿ? ಇದಕ್ಕಾಗಿಯೇ ಚಿಕ್ಕ ಮಕ್ಕಳಿಂದ ಹಿಡದು, ಹಣ್ಣು ಮುದುಕರ ವರೆಗೆ ಎಲ್ಲರೂ ಪಾನಿಪೂರಿ, ಮಸಾಲೆಪೂರಿಯಂತಹ ಫಾಸ್ಟ್ ಫುಡ್ಗಳನ್ನು ಬಯಸುತ್ತಾರೆ. ಹಾಗಾಗಿನೇ ಜಾತ್ರೆ, ಸಮ್ಮೇಳನ, ಸಂತೆ, ವೀಕೆಂಡ್ ಮಹಲ್, ಬೀಚ್, ಪ್ರವಾಸಿ ತಾಣ ಇಷ್ಟೇಕೆ ರಸ್ತೆ ಬದಿಯಲ್ಲಿ ತಳ್ಳು ಗಾಡಿಗಳಲ್ಲಿ ಅಂತಹ ಫಾಸ್ಟ್ ಫುಢ್ಗಳನ್ನು ಮಾರಾಟ ಮಾಡುತ್ತಾರೆ ಹಾಗೂ ಅವುಗಳಿಗೇ ಬಹುಬೇಡಿಕೆ ಇರೋದು ಕೂಡ. ಕಾಸರಗೋಡು ಜಿಲ್ಲೆಯ ಪ್ರಸಿದ್ಧ ಪ್ರವಾಸಿ ತಾಣ ಬೇಕಲಕೋಟೆಯಲ್ಲಿ ಪಾನಿಪೂರಿಯಂತಹ ಫಾಸ್ಟ್ಫುಡ್ಗಳಿಗೆ ಬೇಡಿಕೆ ಕಡಿಮೆ. ಬದಲಾಗಿ ಮಾವಿನಕಾಯಿ, ನೆಲ್ಲಿಕಾಯಿ, ಅನನಾಸುಗಳನ್ನು ನೀರು, ಉಪ್ಪು, ಖಾರ ಮಿಶ್ರಿತ ದ್ರಾವಣದಲ್ಲಿ ನೆನೆಯಿಸಿ ಮಾರುವುದನ್ನು ಹೆಚ್ಚಾಗಿ ಕಾಣಬಹುದು. ಅಲ್ಲದೆ ಬೇಕಲಕೋಟೆ ಸುತ್ತ ಪಾನಿಪೂರಿಯಂತಹ ಫುಡ್ಗಳನ್ನು ಮಾರುವ ಅಂಗಡಿಗಳು ಕಾಣಸಿಗುವುದು ತೀರವಿರಳ. ಬೇಕಲಕೋಟೆಯಲ್ಲಿ ರಸ್ತೆ ಬದಿ ಉಪ್ಪು, ಖಾರ ಮಿಶ್ರಿತ ದ್ರಾವಣವನ್ನು ಬಕೆಟ್ನಲ್ಲಿ ತುಂಬಿಸಿ ಅದರಲ್ಲಿ ಮಾವು, ನೆಲ್ಲಿ, ಅನನಾಸುಗಳನ್ನು ನೆನೆಯಿಸಿಟ್ಟಿರುವುದನ್ನು ನೋಡಿದರೆ ಎಂತಹವರು ರುಚಿ ನೋಡೋಣ ಎಂದು ಆಕರ್ಷಿಸಲ್ಪಡುವುದರಲ್ಲಿ ಸಂಶಯವಿಲ್ಲ.ಬಲು ಅಪರೂಪ
ಅನನಾಸು, ಮುಳ್ಳುಸೌತೆ, ಮಾವಿನಕಾಯಿಗಳನ್ನು ತುಂಡರಿಸಿ ಅವುಗಳ ಮೇಲೆ ಉಪ್ಪು, ಖಾರದ ಪುಡಿ ಸವರಿ ಮಾರುವವುದನ್ನು ಹೆಚ್ಚಿನ ಕಡೆಗಳಲ್ಲಿ ಮುಖ್ಯವಾಗಿ ಪ್ರವಾಸಿ ತಾಣಗಳಲ್ಲಿ ಕಾಣಬಹುದು. ಆದರೆ ಇಲ್ಲಿನಂತೆ ಉಪ್ಪು, ಖಾರ ಮಿಶ್ರಿತ ದ್ರಾವಣ ತಯಾರಿಸಿ ಅದರಲ್ಲಿ ನೆಲ್ಲಿ, ಮಾವಿನಕಾಯಿ, ಅನನಾಸಿನ ಹೋಳುಗಳನ್ನು ನೆನೆಸಿ ವ್ಯಾಪಾರ ಮಾಡುವುದು ನೋಡಲು, ಸವಿಯಲು ಸಿಗುವುದು ಬಲು ಅಪರೂಪ. ಒಂದು ಹೋಳು ತಿಂದರೆ ಸಾಕು. ಮತ್ತೊಂದು ತಿನ್ನುವಷ್ಟು ಅವುಗಳು ರುಚಿಯಾಗಿರುತ್ತವೆ. ಈಗಾಗಲೇ ಬೇಕಲಕ್ಕೆ ಭೇಟಿಕೊಟ್ಟ ಪ್ರವಾಸಿಗರು ಹಿಂದೆ ತಿಂದ ನೆನಪಿನಲ್ಲಿ ಮತ್ತೊಮ್ಮೆ ಉಪ್ಪು, ಖಾರ ಮಿಶ್ರಿತ ಮಾವು, ನೆಲ್ಲಿ ಅಥವಾ ಅನನಾಸನ್ನು ನಾಲಗೆ ಚಪ್ಪರಿಸುತ್ತಾ ತಿನ್ನುವುದನ್ನು ನೋಡಿದರೆ ಹೊಸದಾಗಿ ಬಂದ ಪ್ರವಾಸಿಗರಿಗೂ ತಿನ್ನೋಣ ಅನ್ನಿಸುತ್ತದೆ.
ಉಪ್ಪು, ಖಾರ ಮಿಶ್ರಿತ ಮಾವು, ನೆಲ್ಲಿ, ಅನನಾಸುಗಳನ್ನು ತಯಾರಿಸುವುದು ಕಷ್ಟದ ಸಂಗತಿಯೇನಲ್ಲ. ಅದನ್ನು ನಮಗೆ ಮನೆಯಲ್ಲಿಯೇ ಸಿದ್ದಪಡಿಸಬಹುದು. ಒಂದು ಲೀಟರ್ ನೀರಿಗೆ ಹತ್ತು ಚಾ ಚಮಚ ಉಪ್ಪು, 4-5 ಹಸಿಮೆಣಸು, 2 ಚಾ ಚಮಚ ಕಾಳುಮೆಣಸಿನ ಪುಡಿ ಸೇರಿಸಿ ಚೆನ್ನಾಗಿ ಮಿಶ್ರ ಮಾಡಿ ದ್ರಾವಣ ತಯಾರಿಸಿ. ಮಾವಿನಕಾಯಿಯನ್ನು ಉದ್ದಕ್ಕೆ ಕತ್ತರಿಸಿ ದ್ರಾವಣದಲ್ಲಿ ನೆನೆ ಹಾಕಿ. ಸ್ವಲ್ಪ ಸಮಯದ ಅನಂತರ ಮಾವಿನ ಹೋಳನ್ನು (ಖಾರ ಹೆಚ್ಚು ಬೇಕಾದರೆ ಮೆಣಸಿಸ ಪುಡಿ ಸವರಿ) ತಿನ್ನಬಹುದು. ಇದೇ ತರಹ ಉಪ್ಪಿನ ದ್ರಾವಣ ತಯಾರಿಸಿ ಇಡೀ ನೆಲ್ಲಿಕಾಯಿಯನ್ನು (ಕತ್ತರಿಸದೆ) ನೆನೆಸಬೇಕು. ಅನನಾಸಿನ ಸಿಪ್ಪೆ ತೆಗೆದು ದುಂಡಗೆ ಕತ್ತರಿಸಿ, ಉಪ್ಪಿನ ದ್ರಾವಣದಲ್ಲಿ ನೆನೆಸಿ. ಸ್ವಲ್ಪ ಸಮಯದ ಅನಂತರ ಹೋಳಗಳನ್ನು ಸೇವಿಸಬಹುದು.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ